Katika kuhakikisha wakulima wa zao la korosho wanazidi kunufaika na kilimo chao kupitia minada inayoendelea, bodi ya korosho Tanzania imewataka wakulima hao kusimamia ubora wa korosho zao.
Wito huo umetolewa na mkurugenzi wa bodi ya korosho Tanzania ndg. Francis Alfred oktoba 18, 2024 wakati wa mnada wa pili wa chama kikuu Cha ushirika TANECU wilayani Tandahimba mkoani Mtwara.
Ndg. Alfred amesema kuwa ili kuhakikisha kila mkulima ananufaika na bei nzuri ya msimu huu anatakiwa kupeleka ghalani korosho iliyokauka vizuri kwani mnunuzi hutoa bei kulingana na ubora wa korosho.
Katika mnada huo wakulima wameuza korosho zao kwa bei ya juu ya Tsh 3760/= na bei ya chini ikiwa Tsh 3540/= kwa jumla ya tani 20335 na kilo 417 ambazo zimeuzwa kupitia mfumo wa soko la bidhaa Tanzania (TMX).
