Waziri wa Nchi, Ofisi ya Rais Maendeleo ya Vijana, Mhe. Joel Nanauka, amesema kuwa mbio za Korosho Marathon zimekuwa jukwaa muhimu la kutangaza fursa za uwekezaji katika tasnia ya korosho, kuhamasisha afya kwa kufanya mazoezi, pamoja na kuelimisha jamii juu ya ulaji wa korosho na matumizi ya bidhaa mbalimbali zitokanazo na zao hilo.
Ametoa kauli hiyo katika viwanja vya Millenium, mkoani Mtwara, wakati wa mbio za Korosho Marathon zilizofanyika Novemba 29, 2025. Aidha, amesema kuwa lengo mahususi la mbio hizo ni kupanua wigo wa soko la ndani la korosho ili kuchochea ukuaji wa uchumi wa mtu mmoja mmoja na wa Taifa kwa ujumla.
Kwa upande wake, Kaimu Mkuu wa Mkoa wa Mtwara, Kanali Michael Mtenjele, ambaye pia ni Mkuu wa Wilaya ya Tandahimba, amewataka washiriki na wananchi kuendelea kufanya mazoezi mara kwa mara ili kujikinga na magonjwa yasiyoambukiza ambayo yameendelea kuwa changamoto katika jamii.
Naye Mkurugenzi Mkuu wa Bodi ya Korosho Tanzania, Ndg. Francis Alfred, amesema kuwa Bodi ya Wakurugenzi imetenga kiasi cha shilingi milioni 330 kutoka vyanzo mbalimbali ikiwemo mapato ya Korosho Marathon, fedha ambazo zitatumika kuwawezesha wabanguaji wadogo kwa kuwapatia mashine za ubanguaji.
Mbio za Korosho Marathon zimefanyika Novemba 29, 2025 ikiwa ni msimu wa nne tangu kuanzishwa kwake, na zimehudhuriwa na zaidi ya washiriki 1,000 kutoka makundi mbalimbali. Mhe. Joel Nanauka alikuwa ndiye mgeni rasmi wa mbio hizo.
